خبر صبح/ گروه طنز و کاریکاتور:
یای گئتدی، پاییز گلدی، پاییزدا صفالار وار
توْز- توْرپاغا، هم توستویه دوْلموش، هاوالار وار
باخ «سیما»دا برنامه‌لره، گؤر نه خبردیر
رکلام‌لاری وار، بوْللوجا «رازِ بقا»- لار وار
هردن‌ده «کیلیپ» گوسته‌ریری، حال وئره خلقه
باخ، لذّت آپار، گؤر نه ایلان- قورباغالار وار!
گل تبریزه، میدان چایینا بیر نظر ائیله
ایش ایندی سیچان‌دان سوْروشوب، اژدهالار وار
ال‌لر وار اوْلا، گؤر نئجه ایشلیر بلدیّه
سال چوْخلو اوزه‌ر‌لیک، بولارا مرحبالار وار
دؤرد داملا یاغیش یاغسا، گره‌ک‌دیر گمی گلسین
چون چوْخ خیابان‌دا «آمازون»لار، «کورا»لار وار
هر یاندا یازیلمیش: «بو شه‌هرده گدا اوْلماز»
آنجاق خیابان‌لاردا، دوْیونجا «گدا»لار وار
بوردا، قورو یئرلرده قیزیل قیمتی تاپمیش
دلال‌لار الینده، نه گؤزه‌ل کیمیالار وار!؟
هر بیر رئیسه، تعیین اوْلوب اللی معاون
بیردیر دوْغان، آنجاق‌کی اوْتوز- قیرخ مامالار وار
گؤردون بیری‌نین دیپلومو یوْخ، دوکتورا آلمیش
بیل‌کی، یئکه یئرلرده، بؤیوک آشنالار وار
چوْخ گؤزله‌مه نفتین یوْلونو، سوفرایا گلمه‌ز
چون ناققاکیمی معده‌لر، هم اشتهالار وار
کاش بعضی‌لرین حربه‌سی، تک زر- زوْر اوْلایدی
اوْندان داها چوْخ قوْرخمالی، تزویر- ریالار وار
چوْخدورسادا سؤز، بوردا دایان، ساکت اوْل «آرش»
چون هیکلینه یاخماغا، چوْخ افترالار وار
حمید آرش آزاد
